sinom

1.      SINOM

a.       Amenagi jaman edan

Ewuh aya ing pambudi

Melu edan ora tahan

Yen tan melu anglakoni

Boya keduman melik

Kaliren wekasanipun

Ndilalah kersa  Allah

Begja begjane wong lali

Luwih begja kang eling lawan waspada

b.      Nuladha laku utama

Tumpraping wong tanah jawi

Priyaganing ngeksi ganda

Panembahan senopati

Kapati amarsudi

Sudani hawa lan nepsu

Pinesu tapa brata

Tanapihing siyang ratri

Amemangun karyen nak tyas mring sasama

c.       Sigra kang bala tumingal

Alampah sami medali

Lir thathit wileding ganda

Dhanyang gung manguncang ati

Benjang sang aji mijil

Lathinya medali wuwus

Trustha sura wilaga

Kaya buta singa wergil

Pasthi jongga dhendhanya menyambak baya

d.      Sayektine wong ing donya

Suka syukur mring hyang widi

Kang wus nggelar jagad raya

Samubarang wus cumawis

Kanggo srananing urip

Sarta kabeh titahipun

Aja nganti sangsara

Mangajap sarta mangesthi

Kanthi srana kapitayan sowang sowing

e.       Warna warna kapitayan

Kang tumanduk ing nagari

Kasebut ing paugeran

Empat lima kang wus mesthi

Pancasila tan kari

Janji luhur pandomipun

Iku dadya pranatan

Ora kena den singkiri

Yen mituhu bisa urip karaharjan

f.       Palang merah Indonesia

Tugase sosial warni

Tumrape para bebrayan

Donor getih ambelani

Bela nyawa roh ugi

Nulung ingkang nandhang tatu

Ora mbedakaken titah

Kabeh padha ditulungi

Jejibahan palang merah Indonesia

g.      Sun iki dhutaning nata

Prabu Kenya majapahit

Kekasih damar sasangka

Atma mantune ki patih

Magang anyar awak mami

Lahta bisma praptaningsun

Ingutus sang narpendah

Kinen mocok murdantaji

Margamingsun  ing ngutus ywa mindho kaya

h.      Pepujan kunu swantara

Bumi kelahiran mami

Sun sesuwun mring pangeran

Ing siyang pantara ratri

Tebih natulak sarik

Antuk nugraha hyang agung

Tata tentrem raharja

Adil makmur kang sejati

Kondhang konbul kuncara mring manca praja

i.        Wonten bebadan social

Tetulung dhateng sesami

Biyen mbantu korban perang

Kanthi raos tanpa pamrih

Ekhlas lair lan batin

Henry dunant kang pangayun

Sumebar tekan donya

Tetulung tekan saiki

Wong sing lara lan korban bencana alam

j.        Iku kiprah palang merah

Mekar saindhenging nagri

Mbiyantu ingkang sanyata

Bencana alam upami

Lemah longsor lan banjir

Tsunami lesus lan lindhu

Gunung njeblug kobongan

Nganti leladi ing sakit

Kanthi kridha dhonor darah ingkang nyata

k.      Pangrembakane bebadan

Palang merah kangge siwi

Ingkang wonten pawiyatan

PMR ingkang sayekti

Kuwarasan kaesthi

Praktek teori nyinau

Nulung korban lagi sakit

Amrih jembar kawruh praktek palang merah